Ngu Everson Luhanga
Amapolisa afumene omnye umkhondo malunga netyala lokuqhwesha kukaBester entolongweni, abamba abarhanelwa ababini abongezelelweyo, iqonga leendaba iScrolla.Africa libadiza ngelithi babesebenza kwindlu yolawulo yenkampani yonogada iG4S.
Ababarhanelwa babini, indoda eneminyaka engamashumi amahlanu ananye kunye nowasetyhini oneminyaka engamashumi amathathu anesihlanu, babesebenza njengabalawuli ngobusuku uBester waqhwesha ngabo entolongweni ngonyaka ka2022.
Imithombo ethembekileyo ixelele eliqonga leendaba ukuba esisisbini sathi sanqunyanyiswa emsebenzini yinkampani yonogada iG4S, ekuyinkampani ejongene nokhuseleko kwintolongo iMangaung Correctional Centre ngobusuku waqhwesha ngabo uBester kulentolongo.
Esisibini, sizakuba yinxalenye yeqabane elisebenze noBester uNandipha Magudumana, utata kaMagudumana uZolile Sekeleni, lowo wayesakuba ngumsebenzi wenkampani iG4S kunye nochwepheshe wobuxhakaxhaka beCCTV uTeboho Lipholo enkundleni.
Ngolwesibini kwiveki ephelileyo, amapolisa ongeze umrhanelwa omnye ngexesha bebamba uButi Masukela oneminyaka engamashumi amahlanu ananye.
UButi ubesasebenzela inkampani iG4S ngexesha lokubanjwa kwakhe.
Isithethi samapolisa kuZwelonke uBrigadier Athlenda Mathe uqinisekisile ukuba esisibini sasisebenzela inkampani yonogada iG4S babanjwe ngoMvulo ngokunxulumene nokuqhwesha kukaBester eluvalelweni kunyaka ophelileyo.
“Esisibini sibanjwe kwikhaya laso eBloemfontein ngoMvulo umhla wokuqala kwekaCanzibe,” utshilo uMathe.
UMathe uthe uphando lwetyala lokuqhwesha lukaBester lubangele ukuba kubanjwe abarhanelwa abasibhozo ukuzakuthi ga ngoku, nalapho kulindeleke ukuba elinani lande.
Lombulali sele egwetyiwe ophinde abe sisidlwengu uThabo Bester wabanjwa kwinyanga ephelileyo eArusha eTanzania emva kokuqhwesha kweli kunye neqabane lakhe uGqr Nandipha Magudumana.
Kwiveki ephelileyo, umzimba wendoda eyafunyanwa eziseleni zikaBester ukwazile ukufunyaniswa nabazali bexhoba ngosetyenziswa nomnombo weDNA.
UBester wayegwetywe ubomi entolongweni ngelixesha agqekezayo kwintolongo enokhuseleko oluluqiima, ngenyanga kaCanzibe kunyaka ka2022.
UBester osele egcinwe kwintolongo yesibini iKgosi Mampuru ulindeleke ukuba abuyele kwakhona kwinkundla kamantyi eBloemfontein ngomhla weshumi elinesithandathu kwekaCanzibe.
Umfanekiso ongasentla: UThabo Bester oweqhwesha kwiziko iMangaung Correctional Centre ngenyanga kaCanzibe ngonyaka ka2022
Imvelaphi yomfanekiso: Ikhasi likaTwitter
